Aulaad

1. Rasul e Khuda (sawa):
Jo shakhs apne bacche ka bosa leta hai (kiss karta hai) Khuda uske liye ek neki likhta hai.
Isi tarah farmaya:
Baccho ka jyada bosa liya karo. Beshak har bose ke muqable me tujhe Jannat me ek darja milega ke jiski masafat 500 saal hai.
(Al kaafi, vol 6, 49;
Rawzatul waezin, Page 369;
Mafatihul Hayaat, Page 233, (Urdu Edition)

2. Rasul e Khuda (sawa)
Apne baccho ka ehteram karo, unki acchi tarbiyat karo kyuki isse tumhari maghferat hoti hai.
(Makaremal akhlaq, 222;
Mafateehul Hayaat ( Urdu Edition ), Page 234)

3. Rasul e Khuda (sawa):
Khuda aise shakhs par rahmat kare jo apne bacche ke nek kamo me uski madad kare.
Poocha gaya: Kaise? Neki me kis tarah madad ki jaye?
Aap ne farmaya: Jis cheeza ki wo qudrat rakhta hai usse qabul karo aur jo kaam uske liye mushkil ho us se darguzar karo.
(Al-Kaafi, vol 6, page 50)

4. Rasul e Khuda (sawa):
Jo shakhs bazar jata hai aur tohfe kharid kar le aata hai aur wo ape ahl o ayaal ko deta hai aisa shakhs dar haqiqat faqeero ke liye sadqa de raha hota hai.
Bacchiyo ko baccho par muqaddam rakho kyuki jo shakhs betiyo ko khush rakhta hai wo us shakhs ki tarah hai jisne Hazrat Ismael (as) ki nasl se ek ghulam aazad kiya ho.
(Al-amaali, Shaikh Saduq, page 577)

5. Rasul e Khuda (sawa):
Apne baccho ko hadiya dete waqt musawat (equality) qaem karo, agar chahte ho ki kisi ko jyada hadiya do to pahle betiyo ko do.
(Al-Khilaf, Shaikh Tusi, vol 3, page 564)

6. Rasul e Khuda (sawa):
Badtarin shakhs wo hai jo apne ghar waalo k saath sakhti se pesh aaye.
Kisi ne poocha, ghar waalo se sakhti ka kya matlab hai?
Aap ne farmaya: Jab koi shakhs apne ghar me dakhil ho aur us k biwi bacche dare aur jab ghar se bahar jaye to biwi bacche khush ho. 
(Nahjul Fasahah, Page 538;
Majmauz zawaed wa manbaul fawaed, vol 8, page 25; Mafateehul Hayaat(Urdu Edition), Page 226)

7. Baccho ke Huquq:
Ahle bait (as) ki riwayaat me, waledain baccho ke huquq ke ohdedaar hai aur un ke huquq is tarah hai:-
1-    Accha naam intekhab karna
2-    Us ki maa ka ehteraam karna
3-    Waledain se mansub karna
4-    Nezafat (cleanliness)
5-    Munasib khana khilana
6-    Talim o tarbiyat
7-    Un se mohabbat
8-    Un ka ikram
9-    Nek kaam me unki madad karna
(Mafateehul Hayaat(Urdu Edition), Page 227)

8. Imam Sajjad (as):
Bacche ka haq ye hai ki tum jaanlo ke is duniya me us (bacche) ka accha ya bura hona tum se murtabit hai (tum pe depend karta hai).
(Man la yahzuruhul faqih, vol 2, page 622;
Mafateehul Hayaat(Urdu Edition), Page 227)