'Ya Allah'

1. Rasule Khuda (saww):
Jo koi 10 martaba 'Ya Allah' kahega, to usay kaha jaayega "Labbaik, Mere Bande, maang jo bhi teri haajat hai ke wo poori ki jayegi".
(Uddatud Dai)

2. Imam Ali (as):
Jo koi Quran mein se koi bhi 100 Ayat padhe aur phir 7 martaba 'Ya Allah' kahe, to agar wo Chattaan bhi hilaana chaahe to Insha Allah, hilaa sakega.
(40 Hadiths – Quran)

3. Imam Baqir (as):
Jab qeh-qahe maaro (bahut zor se ha'nso) to ba-taur Kaffara Khuda se kaho, "Ya Allah, mujhe dushman na rakhna."
(Amaali - Shaikh Mufeed, p46)

4. Imam Sadiq (as):
Mizaah (humour / vinod) se apne bhaiyo'n ko khush rakha karo, bus fawaahish (obscenity / ashleelta) se duur raho. Momin ka ha'nsna uska muskurana hai. Zyada ha'nsna dil ko maar deta hai, ye Deen ko bhi maar deta hai jaise namak paani mein ghul jaata hai. Qehqehe lagaana Shaitani amal hai. Qehqehe lag jaaye to fauran Allah se maafi maango aur kaho 'Ya Allah, mujhe dushman na rakhna'.
(Aqwaal e Masoomeen (as), p161)

5. Imam Baqir (as)
ke kisi bachche ko pareshaani huwi to aap ne uske qareeb jaa-kar bosa liya aur phir farmaya, "Aye bete! Tum kaise ho?" Usne kaha, "Mujhe takleef hai". Imam (as) ne farmaya, "Jab tum Namaz e Zuhr padho to 10 baar kaho Ya Allah! Ya Allah!...Pus, jab koi musibat-zada is tarah kehta hai to Allah kehta hai, "Aye bande, Main haazir hoo'n, bataa teri kya haajat hai?"
(Tibb ul Aimma (as), p7)

6. Rasule Khuda (saww)
ne 3 martaba dohraate huwe farmaya, "Ya Allah, mere Khulafa par Rahem farma".
Logo'n mein se kisi ne arz kiya, "Ya Rasulallah (saww), aap ke Khulafa kaun hai?"
Farmaya, "Wo log hain jo meri wafaat ke baad paida honge. Wo meri Ahadees aur Sunnat ko naql karenge, unko dil o jaan se dost rakhenge, logo'n mein tableegh karenge aur unko (Ahadees ki) taalim dene ki koshish karenge. Yehi log Jannat mein mere saathi honge". (Bihaar ul Anwaar, v2)
(Nawaadirul Ahadees, v1, p42)